काठमाडौं। नेकपा एमालेका अध्यक्ष केपी शर्मा ओलीसँगको भेटमा कोशी प्रदेशका मुख्यमन्त्री हिक्मतकुमार कार्कीले राजीनामा नदिने अडान दोहोर्याएका छन्।
मंगलबार साँझ गुण्डुमा करिब एक घण्टा भएको छलफलमा अध्यक्ष ओलीले नयाँ राजनीतिक कोर्सका लागि मार्ग खुला गर्न राजीनामा दिन आग्रह गरेका थिए। तर मुख्यमन्त्री कार्कीले आफू धारा १६८ (५) बमोजिम नियुक्त भएको उल्लेख गर्दै राजीनामा दिए संवैधानिक जटिलता सिर्जना हुने र राजनीतिक सन्देश पनि सकारात्मक नजाने तर्क गरेका थिए।
स्रोतका अनुसार छलफलमा दुवै पक्षले आफ्ना-आफ्नै धारणा राखे पनि कुनै निष्कर्ष निस्कन सकेन। थप छलफल गर्ने सहमति भएको भए पनि त्यसको समय भने तय भएको छैन।
यसअघि पनि अध्यक्ष ओलीले कार्कीलाई गुण्डु बोलाएर राजीनामा दिन निर्देशन दिएका थिए। त्यसपछि पूर्वमुख्यमन्त्री शेरधन राईलाई विराटनगर पठाइए पनि कार्की आफ्नो अडानबाट पछि हटेका छैनन्।
यसबीच विराटनगरमा एमाले प्रदेश सांसदहरूको हस्ताक्षर संकलन भइरहेको स्रोतको दाबी छ। आन्तरिक मामिला तथा कानुन मन्त्री इन्द्रमणि पराजुलीले पार्टीको निर्णय कार्यान्वयनका लागि सांसदहरूसँग हस्ताक्षर गराइरहेको बताइएको छ।
मुख्यमन्त्री कार्कीलाई हटाउने अभियानमा शेरधन राईसँगै पराजुली सक्रिय रहेको स्रोतको भनाइ छ। यद्यपि कार्कीले आफूले राजीनामा दिए संवैधानिक र राजनीतिक दुवै हिसाबले जटिल अवस्था सिर्जना हुने अडान कायम राखेका छन्।
