काठमाडौं। बागमती प्रदेश सरकारले प्रशासनिक संरचनालाई चुस्त बनाउने उद्देश्यसहित मन्त्रालयको संख्या १४ बाट घटाएर ८ मा झारेको छ। मन्त्रालयको संख्या कटौती गरेसँगै मन्त्रीहरूको नयाँ कार्यविभाजन समेत गरिएको छ।
नेपालको संविधानको धारा १६८ को उपधारा (९) बमोजिम मुख्यमन्त्री इन्द्रबहादुर बानियाँको सिफारिसमा प्रदेश प्रमुख दीपकप्रसाद देवकोटाले शुक्रबार नयाँ कार्यविभाजन स्वीकृत गर्नुभएको हो।
मन्त्रीहरूको नयाँ कार्यविभाजन र मन्त्रालय
नयाँ कार्यविभाजन अनुसार ७ जना मन्त्रीले विभागीय जिम्मेवारी पाएका छन् भने ६ जना मन्त्रीलाई बिनाविभागीय राखिएको छ।
जिम्मेवारी पाएका मन्त्रीहरू:
मधुसूदन पौडेल: कृषि, पशुपन्छी, वन तथा वातावरण मन्त्रालय
शिवराज अधिकारी: आन्तरिक मामिला, कानुन तथा सहकारी मन्त्रालय
कञ्चनचन्द्र वादे: स्वास्थ्य तथा सामाजिक विकास मन्त्रालय
डा. दिनेशचन्द्र देवकोटा: भौतिक पूर्वाधार विकास मन्त्रालय
प्रभात तमाङ: आर्थिक मामिला तथा योजना मन्त्रालय
कृष्णकुमार तामाङ: खानेपानी, ऊर्जा तथा सिँचाइ मन्त्रालय
बिन्दु श्रेष्ठ: उद्योग, पर्यटन, श्रम तथा यातायात मन्त्रालय
बिनाविभागीय मन्त्रीहरू:
किरण थापा मगर, उर्मिला नेपाल, भरतबहादुर केसी, सुरेश श्रेष्ठ, जयराम थापा र बिनु रायमाझी पौडेललाई हालका लागि कुनै मन्त्रालयको जिम्मेवारी दिइएको छैन।
दलीय भागबन्डा र सरकारी तयारी
काठमाडौँ/हेटौँडा स्रोतका अनुसार स्वीकृत ८ मन्त्रालयमध्ये मुख्यमन्त्री तथा मन्त्रीपरिषद्को कार्यालयसहित ५ मन्त्रालय नेपाली कांग्रेसको भागमा परेको छ। सत्ता साझेदार दल नेकपा (एमाले) ले भौतिक पूर्वाधारसहित ३ मन्त्रालय प्राप्त गरेको छ।
सरकारको स्पष्टीकरण:
सरकारले प्रशासनिक खर्च घटाउन मन्त्रालयको संख्या कटौती गरे पनि सत्ता समीकरणका कारण सबै मन्त्रीहरूलाई तत्काल व्यवस्थापन गर्नुपर्ने बाध्यता आइपरेको थियो। सोही कारण ६ मन्त्रीलाई बिनाविभागीय बनाइएको हो। मन्त्रालय अन्तर्गतका कार्यालय, कर्मचारी तथा सङ्गठन र व्यवस्थापन (ओएन्डएम) सर्वेक्षणको प्रक्रिया पूरा भएलगत्तै उनीहरूलाई आवश्यकताका आधारमा थप जिम्मेवारी तोकिने सरकारी तयारी छ।
