काठमाडौँ। काठमाडौँ जिल्ला अदालतले महाराजगञ्जमा जेनजी प्रदर्शनका क्रममा प्रहरी जवान उत्तम थापाको हत्या प्रकरणमा संलग्न ठहर गरिएका ४ जनालाई पुर्पक्षका लागि थुनामा पठाउने आदेश दिएको छ।
जिल्ला न्यायाधीश हरिप्रसाद कोइरालाको इजलासले आइतबार गोर्खाका २२ वर्षीय सोम गुरुङ, तनहुँका २१ वर्षीय राजीव गुरुङ, पर्साका २० वर्षीय युनिक श्रेष्ठ र सिन्धुलीका १९ वर्षीय विनोद कार्कीलाई पुर्पक्षका लागि थुनामा पठाउने आदेश दिएको हो।
भदौ २३ र २४ गते महाराजगञ्ज क्षेत्रमा भएको जेनजी आन्दोलनका क्रममा प्रहरीमाथि भएको आक्रमणमा असई मिलन राय र प्रहरी जवान उत्तम थापाको ज्यान गएको थियो।
यस घटनामा पहिले पक्राउ परेका अभियुक्तहरू, युवराज क्याप्छाकी, सोनाम तामाङ उर्फ बुद्धिलाल थिङ, होमप्रसाद पौडेल र टिकाराम विकलाई समेत यसअघि नै अदालतले पुर्पक्षका लागि कारागार चलान गरिसकेको थियो।
प्रहरी अनुसन्धान अनुसार काभ्रे रोशीका युवराज क्याप्छाकी र मकवानपुर थाहा–७ का सोनाम तामाङ (बुद्धिलाल थिङ)ले प्रहरी जवान उत्तम थापालाई कुटपिट गरी हत्या गरेका थिए।
सिन्धुपाल्चोक त्रिपुरासुन्दरी–४ का ६२ वर्षीय होमप्रसाद पौडेल र उदयपुर चौदण्डीगढी–१० का २८ वर्षीय टिकाराम विकले असई मिलन रायको हत्या गरेको निष्कर्ष अनुसन्धानमा खुलेपछि जिल्ला सरकारी वकिलको कार्यालयले उनीहरूमाथि मुद्दा दर्ता गरेको थियो।
नयाँ पक्राउ परेका ४ जनालाई पनि अदालतले समान प्रकृतिको आरोपमा पुर्पक्षका लागि थुनामा राख्ने आदेश दिएसँगै उक्त मुद्दा अब दुवै प्रहरीको हत्या प्रकरणसँग जोडिएर अघि बढ्नेछ।
