काठमाडौँ — प्रतिनिधिसभा निर्वाचनका लागि मनोनयनपत्र दर्ता गराएका उम्मेदवारमाथि परेको उजुरीबारे निर्वाचन आयोगले जाँचबुझ गरिरहेको छ। आयोगले बुधबार दिउँसोदेखि नै मनोनयनपत्र तथा उजुरीमाथि प्रारम्भिक जाँच सुरु गरेको हो।
निर्वाचन आयोगका सहायक प्रवक्ता कुलबहादुर जिसीका अनुसार आज बेलुकी ५ बजेदेखि ७ बजेसम्म उम्मेदवारको नामावली सार्वजनिक गरिने निर्वाचन कार्यक्रम तय गरिएको छ। आजकै दिन मनोनयनपत्र तथा उजुरीमाथि जाँचबुझ र आवश्यक निर्णय गरी नामावली प्रकाशन गरिनेछ।
आयोगले माघ ९ गते शुक्रबार बिहान १० बजेदेखि दिउँसो १ बजेसम्म उम्मेदवारलाई नाम फिर्ता लिने समय तोकेको छ। सोही दिन दिउँसो १ बजेदेखि ३ बजेसम्म उम्मेदवारको अन्तिम नामावली प्रकाशन गरिनेछ। त्यसपछि दिउँसो ४ बजेदेखि साँझ ७ बजेसम्म उम्मेदवारलाई निर्वाचन चिन्ह प्रदान गर्ने कार्यक्रम रहेको आयोगले जनाएको छ।
शुक्रबार ७७ मुख्य निर्वाचन अधिकृतको कार्यालय र ८८ निर्वाचन अधिकृतको कार्यालयमा यी तीनवटै कार्यक्रम सञ्चालन हुनेछन्।
आयोगमा प्राप्त विवरणअनुसार देशभरबाट कुल ३ हजार ४८७ जनाले उम्मेदवारी दर्ता गराएका छन्। जसमा पुरुष ३ हजार ८९, महिला ३९६ र तेस्रो लिङ्गी १ जना रहेका छन्।
उम्मेदवारमध्ये चार जिल्लाका पाँच जनाविरुद्ध उजुरी परेको छ। उजुरी परेका उम्मेदवारहरूमा सुनसरी निर्वाचन क्षेत्र नं. २ का एक, रौतहट निर्वाचन क्षेत्र नं. १ का एक, भक्तपुर निर्वाचन क्षेत्र नं. २ का दुई र कैलाली निर्वाचन क्षेत्र नं. १ का एक जना रहेका छन्। ती उजुरीमाथि हाल सम्बन्धित निर्वाचन अधिकृतको कार्यालयमा जाँचबुझ भइरहेको आयोगले जनाएको छ।
