कपिलवस्तु – नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) को केन्द्रीय समिति बैठकमा बोल्ने दुई तिहाइभन्दा बढी सदस्यले नेकपा माओवादी केन्द्र र समाजवादी मोर्चासँग तत्काल पार्टी एकता गर्नुपर्नेमा जोड दिएका छन्।
कपिलवस्तुको शिवगढीमा आयोजित बैठकले पार्टीको भविष्यको दिशा निर्धारण गर्ने महत्वपूर्ण छलफलमा केन्द्रित छ। बैठकमा बोल्ने अधिकांश केन्द्रीय सदस्यहरूले माओवादी केन्द्रसँगको एकतालाई प्राथमिकता दिनुपर्ने धारणा राखेका छन्। प्रदेशगत रूपमा पनि पार्टी एकताका पक्षमा मत आएको नेताहरूले बताएका छन्।
बैठकमा विभिन्न अनलाइन र व्यक्तिहरूबाट भइरहेको एकता र ध्रुवीकरण विरोधी गतिविधिबारे पनि छलफल भएको थियो। अनौपचारिक रूपमा धेरै केन्द्रीय सदस्यहरूले महासचिव विप्लवलाई भेटेर तत्काल ठोस निर्णय गरेर एकताको पहल गर्न आग्रह गरेका छन्। “यदि निर्णय सदस्यहरूको भावनाअनुसार नआए, नयाँ ढंगले बहसमा लाग्ने तयारी छ,” नेताहरूले भने।
केही नेताहरूले भने विप्लवलाई केन्द्रमा राखेर माओवादी धारलाई कमजोर बनाउने प्रयास भइरहेको भन्दै चिन्ता व्यक्त गरेका छन्।
यस बैठकले भूमिगत राजनीतिबाट व्यवस्थागत राजनीतिमा संक्रमणलाई पनि उजागर गरेको छ, जसले पार्टीको ऐतिहासिक क्षणको रूपमा मूल्यांकन गरिएको छ।
